چار گول ژ گۆلیستانا سەعدى

سەعدیێ شێرازى(606مش – 690مش) -  ڤەگوهاستن ژلاتینى: وەحید سندى

1

ل دیاربەکرێ ئەز بووم مێهڤانێ کالەپیرەکێ (پیرەمێرەکێ)، ئەو زەنگینبوو، بابێ کورەکێ گەلەک تازەبوو، وى شەڤەکێ چیرۆکا خوە بۆ من گوت:"من دهەموو ژیانا خوەدا ژبلى ڤى کورى چ کورێ ندى نینن، لڤان دەڤەران گەلیەک هەیە، لوى گەلى دارەک پیرۆز هەیە، خەلک دچوون دەڤ وێ دارێ و بۆ خوە دوعا ژ یەزدانى دکرن، من ژى بێ هەژمار شەڤ و ڕۆژێن خوە لدەڤ وێ دارێ دەربازکرنە و من گەلەک دوعاکرن داکۆ خودێ کورەکێ بدەت من ".

لوى دەمى من گوه لێ بوو کورێ ویێ دبێژت: "خوەزى من زانیبا کا ئەو دار لکیڤەیە؟ ئەز داچم دەڤ و دعا ژ خودێ کەم داکۆ ڕۆحا ڤى پیرەتەوتى ستاندبا و نەهێلابا ساخ ".

بابى بهەمى کەیف خوەشى دگوت"کورێ من ژیرە ".

کورى ژى ژ تەحنڤە دگوت"خودێ نەهێلایى؛ مەژى ڕەشە !"

سال و دەم بورین

و تو نەچوویە سەر گورا بابێ خوە

تە چ قەنجى ل بابێ خوە کرییە

داکۆ هەمان قەنجى ژ کورى بۆ تە بهێت؟

2

گالەنوسەکى دیت کەسەکێ ئاقل سڤک دپاتکا زانایەکێ ڕاگرتبوو، گوتنێن کرێت دگوتنێ، گالەنوسى گوتێ:"ئەوێ زانا بێ ئاقلە یان ئەو نەدکەڤت ڤى دەراڤێ تەنگ ".

دناڤبەرا دوو هوشمەنداندا چ جاران نیقاش و شەرەنیخ درست نابت

یێ فەهما و تێگەهشتى ژى بت چ جاران ب کەسێ نەفەهمارا کەنگەشێ ناکەت .

ئەگەر کەسێ بێ ئاقل دبێ عەرزیا خوەدا زمانەکێ بکار بینت ژى،

کەسێ ئاقلدار دێ وى ب دل نەرمیا خوە بێ دەنگ کەتن .

دوو مرۆڤ ژیر، دەزیەک ژى دێ دناڤبەرا واندا ساخلەم مینیت،

دناڤبەرا ئێکێ سەرنەرم و ئێکێ سەرهشک داژى دێ هەر وەسابیت .

بەلێ ئەگەر هەردوو ئالى مەژى هشک بن،

زنجیرا ئاسنى ژى دێ دناڤبەرا واندا شکێت .

زەلامەک نەباش ڕادایى کەسەکێ حەقارەتکر،

یێ حەقارەت لێ هاتى کرن، بالا خوەدا سەر و گوت:"ئەى زەلامێ چاک،

تو چ بێژى ژى ئەز هێشتا خرابترم ژى، چونکى ئەز بخوە کێماسیێن خوە ژ تە باشتر دنیاسم ".

3

دەروێشەک؛ کۆ پتریا جاران دعایێن وى قەبیل دبوون، هات بەغدایێ و بەحسا وى بۆ فەرماندارێ وى دەمى (حەجاج بن یوسف سەقەفى) هات کرن، وى گازى دەروێشى کر و گوتێ:"بۆ من تشتەکێ باش بخوازە ژ خودێ !"

دەروێشى دعاکرن:"خودا تو رۆحا ڤى بستینى! ئەى خودێ "

حەجاج گەلەک قەهرى:"ما دعایێن باش هوسانن؟ "

دەروێشى بەسڤدا:"بەلێ، بەلێ بۆ تە و بۆ هەموو موسلمانان ژى "

ئاخ هێزدارۆ، یێ تو زۆریێ لبن دەستێ خوە دکى

ما هەتا کەنگى ئەڤ بازار دێ بێ وەج بت؟

ما سەرۆکاتیا دنیایێ دێ چ مفایى گەهینت تە؛

خوەزى تو بمرى و زۆرداریێ لمرۆڤان نەکى .

4

پاشایەک خراب و زۆردار، ژ زەلامەک چاک و ئیماندار پرسى:"مرۆڤ چەوا دشێت ب ڕەنگەکێ باش پەرستنا خودێ بکەت؟ "

زەلامى بەرسڤدا:"یا ژ هەمیان باشتر تو پەرستنا خودێ بکەى، ئەوە تو نیڤ ڕۆژێ بنڤى، داکۆ بیستەکێ گەل بشێت بخوەشى بژیت ".

من دیت خرابکارەک نیڤا ڕۆژا خوە دنڤست

و من گوتێ:"باشترە کۆ ئەڤ بەلا بنڤیت ".

یێ ڕازاى و نڤستى زێدەتر قەنجیێ دکەت ژیێ هشیار، باشترە بمرە، نەکۆ ژیانا خوە یا خراب بەردەوام بکەت .