حەژێکرنا خودێ ل سەر هەمیانە
ئەیاز عبدالله مزورى
ئیسلام نە ئایینێ توندیێ یە ب هەمی ڕەنگەكی ژبەر هندێ ژی خودایێ شەهرەزا و مەزن ئایینێ خۆ ب خورتی نەدایە چ كەس و مللەتان و دشیا هەمی خەلكێ مەكەهی پێكڤە بكەتە موسلمان, ئان ژناڤ ببەت دەمێ گاوری كری, بەلێ ڤیا خەلك ب دل و جان وەربگرن و بچیتە دناڤ ناخ و دل رووح و دگەل هەمی دەمار و لەشێ وانا بهێت و بچیت و دگەل هاتن و چوونا واندا بیت, هەتا كاریگەری لسەر گۆتن و كار و كریارێت واندا هەبیت, چونكی ئیسلام یا هاتی دەمێ كەسەك ئینتمائا ئیسلامێ بكەتن و نڤێژ و ڕۆژی و حەجێ بكەتن ئاها دگەل هندێ ژی دا دڤێت یێ زمان پاك و بازار خۆش و ڕەوشت جوان و ڕێزگر و خودان سەرەدەرییەكا جوان بیت و خەلك ژ دویرڤە وی و ئایینێ وی بناسن, نەك ببیتە بارەكێ گرن ل سەر ئایینی و خەلكی ب كرێتیا سەرەدەرییا خۆ ژ ئیسلامێ دویر بێخیت, بلا دەه جاران ژی حەجی و نڤێژكەر بیتن, چونكی دڤێت نڤێژ و دینداری بچتە دناڤ مرۆڤیدا نەك بتنێ ئینتمائەكا ناڤی بیتن!!
دەمێ پێغەمبەری(سلاڤێت خودێ لسەر بن) مەكەه ڤەكری و مەكەه كەفتیە ژێردەستێ ویدا, هندەك ژ گاوران گۆتن ئەی موحەممەد ئازادیێ بۆ ماوێ چوار هەیڤان بدەمە ئەم باشتر تە و ئایینێ تە بنیاسین و ببینین, پاشی ئەگەر مەڤیا دێ موسلمان بین و ئەگەر نە موسلمان نابین, پێغەمبەری(سلاڤێت خودێ لسەر بن) گۆتێ نەك چوار هەیڤ بەلكی چوار سال بۆ هەوە و هین دئازادن, ئەگەر هەوە ڕەوشتێ ئیسلامێ و موسلمان دیتن و زانی یێ پاك و چاكە هین ل وی دەمی دشێن ببنە ئیماندار و ئەگەر پشتی ئەڤان چەند سالان و ئەڤێ دیتنێ هەوە چ جوانی و باشی ژ وان نەدیت هەر ل سەر یا خۆ بن و ئەزیەتێ نەگەهیننە كەسەكێ نە ژ موسلمانان نە ژ خەلكێ دی!
ئەڤەیە تێگەهشتنا دروست ژ ئیسلامێ چونكی هەر دەما تە كەسەك ب خورتی كرە موسلمان ل ئەوی دەمی تە موسلمانەك زێدە نەكر بەلكی تە دوو ڕوویەك(مونافق)ەك زێدەكر, و یا دیارە گاور باشترە ژ دوو ڕوویی, چونكی خرابیا گاوری بۆ وییە و یێ دیارەیە ب ئایینێ تە ڕازی نابیتن, بەلێ دوو ڕووی ب سەرڤە موسلمانە و ل بنڤە پێلانا ددانیت دژی ئیسلامێ و موسلمانان!
ئەڤجا خودایێ مەرد و خۆشتڤی یاسایەك دانا و ل جیهانێ ئاشكەرا كر دەمێ كەرمكری: [لا إكراە فی الدین], خورتی لێكرن د ئایینیدا نیینە, بەری بێهنەكێ برایێ من(سەربەست)ی تەلەفون كر و گۆت گەنجەكێ ل ڤێرە یێ دبێژیت: هەتا كەنگی بابێ من ماف لسەر من هەیە بێژیت نڤێژا بكە و دارێ وی لسەر من بیت؟!! ئاها ل ڤێرە خەلەتیێ دەست پێكر دەمێ خەلكی فێر بكەین ب شەق و پێن و داری نڤێژا بكەن و هەتا دیندار ببن ژ ترساندا... خودێ نەڤێت كەس ب شەقا فێری نڤێژا ببیت و ژ ترسێن شەقاندا نڤێژان بكەتن, ئەرێ ما بۆ خودێ نڤێژا دكەتن ئان بۆ باب و شەقان, ئەسلێ نڤێژێ پەیوەندیا حەژێكرنێ یە دناڤبەرا بەندەی و خودایێ بەندەیدا نەك شەر و نەڤیانە, ئەرێ پا هەگەر باب مر ئەڤ كەسێ د ترسێن بابیدا نڤێژان دكەت دێ یێ بەردەوام بیت؟! ئان دێ كەسەكێ دی ژی ب شەقان فێركەت و هوسانێ دێ جەنگ یێ بەردەوام بیتن! (الله) هەر یێ هەی و نامریت و خەلكی ژی فێری ئەڤێ حەژێكرنا وی بكەن, و یێ نێزیكی هەر كەسەكێ یە كو بڤێت پەیوەندیێ دگەلدا بگرێدەت و دگەل پاخڤیتن..
ئەم بهێین دگەل پارچەكا شعرا مامۆستایێ كورد و فەیلەسوفێ مەزن- ئەحمەد موفتی زادە- دەمێ بەحسا دگەل خودێدابوونێ دكەت و خۆشیا دگەل وی كەسیدا ئەو كەسێ دگەل خودێ دا بیتن:
لـە جەرگەی جەمی یارانی گیانی
تـۆ نەبـێ هێشتا خۆم پێ تەنیایە
تـۆم هــەبێ تەنـها لـە إنفـرادی
لێم جەمە هەر چی خۆشی دونیایە
ئانكو: ئەگەر دناڤ گەرما هەڤال و جەرگێ یاراندا بم بەلێ تۆ دگەل مندا نەبی- مەرەم پێ خودێ یە- ئەز هەر یێ ب تنێ مە, و تۆ دگەل مندا بی ل جهەكێ بتنێ ژی بم, هندی خۆشییەكا دونیایێ یە یا دگەل مندا...
ئەڤەیە خوداپەرستی و خوداناسی و حەژ خودێ كرن, ل وی دەمی یێ ب تنێ یە ئەو دەما خودێ دگەلدا نەبیت و بلا هەمی هەڤال و خۆشتڤی ژی دگەلدا بن, مادەم خودێ دگەلدا نینە ب چ نزانیتن, و ل ئەوی دەمی هەمی خۆشیێت دونیایێ ل دەف دەما خودێ ب كەرامەتا خۆ دگەلدا بیت, نە وەكی وی گەنجێ هەتا بەحسا حەژێكرنا خودایی بۆ نەكەی هەر نزانیت حەژێكرنا خودایی چییە, و بتنێ بۆ حەژێكرنەكێ یێ چووی و ئەو حەژێكرن ژی یا خودێ هەر تێدا نینە, ئەڤجا ئەڤێ ژ من وەربگرن هەر حەژێكرنەك هەوە ژ حەژێكرنا خودایی دویر بێخیت هین ژی خۆ ژێ دویر بێخن, مەبەستا من ژی ئەو نینە دڤێت بتنێ حەژ خودێ بكەی ئەڤە كەس نەشیایە بكەت هەتا پێغەمبەری ژی یا حەژ هەڤژین و زارۆك و خەلكی كری, بەلێ دڤێت حەژێكرنا خودایی ل سەر هەمی حەژێكرنان بیت و پتری هەمیان ئەو خۆشتڤی بیت, هەتا ببینە خودان باوەرییەكا پاك و دلەكێ تەنا و عەقلەكێ خۆ ڕاگر... ل دوماهیكێ داخوازێ ژ هەوە دكەم منێ هەژار ژ دوعایێت خۆ یێت چاك بێ بەهر نەكەن. و صلی اللهم علی حبیبنا محمد(صلی الله علیە وسلم).