نووسینی: عه‌زیز نه‌سین
وه‌رگێرانی له فارسییه‌وه: عه‌بدوڵڵا مه‌جید
له ناوه‌ڕاسته‌وه بڕۆ
كه‌سێ له پشه‌وه بانگی كردم. ده‌نگه‌كه گه‌لێ ناسراو بوو. لێ چه‌ند كۆشام، نێوی خودان ده‌نگه‌كه‌م ناس نه‌كرد. به‌ده‌م ته‌وقه‌كردنه‌وه چاكوچۆنیمان كرد و له ئه‌حواڵی یه‌كترمان پرسی. كاورا گوتی:
_"ئه‌وه له ناوه‌ڕاستی شاره‌وه دێم، له لای پزیشك بووم."
+خوا له به‌ڵا دوورمان كا.
_دومه‌ڵێك له ناوه‌ڕاستی سه‌رمه‌وه ده‌رچووبوو، دومه‌ڵێكی هه‌وكردوو و پڕ له كیم.
+سه‌لامه‌تییه ئینشاڵڵا، چاك ده‌بی هیچ نییه!
له ناوه‌ڕاستی ڕێگه داوای لێ كردم بچینه قاوه‌خانه‌یه‌ك تاوێ دانیشین، پشوویه‌ك بده‌ین و قاوه‌یه‌ك بخۆینه‌وه. قه‌بووڵم كرد.
گارسۆنه‌كه‌ی بانگ كرد:
_ دوو قاوه‌مان بۆ بهێنه.
+تاڵ یا شیرین؟
_ئه‌وه‌ی من نه تاڵ نه شیرین، با ناوه‌ندی بێ!
ئه‌م دۆسته‌ی من فره په‌ست و بێحاڵ بوو، گوتم:
+چی ئاوا ناڕه‌حه‌ت و بێزاری كردووی؟
_كوڕه ناونجییه‌كه‌م له خوێندندا زۆر ته‌نبه‌ڵه، به‌و حاڵه‌ی ته‌واو بێ ئۆقره‌ی كردووم. له تاقیكردنه‌وه‌دا كه‌وتووه. مامۆستا لێی پرسیوه: سه‌ته‌كانی ناوه‌ڕاست چین؟ نه‌یتوانیوه به‌رسڤی بداته‌وه.
+له پۆلی چه‌نده؟
_دووه‌می ناوه‌ندی.
له تاقیكردنه‌وه‌كانی تردا هێنده خراپ نه‌بوو، گشت نمره‌كانی ناوه‌ند بوون. به‌ڵام له‌مه‌ی ده‌رباره‌ی سه‌ته‌كانی ناوه‌ڕاسته‌وه، بووه سفری هێناوه!
+خه‌م مه‌خۆن، ئه‌مساڵ هه‌رچۆن بووه هه‌ر ده‌رده‌چێ.
_وه‌لێ كوڕه گه‌وره‌كه‌م تا بڵێی ئۆگری مێژووه، به تایبه‌ت چاخه‌كانی به‌ر له سه‌ته‌كانی ناوه‌ڕاست و پاش سه‌ته‌كانی ناوه‌ڕاست!
ئه‌ز، هێشتا به ڕه‌وانی بیرم نه‌ده‌هاته‌وه ئه‌و كیێه! ئیتر بۆ ئه‌وه‌ی به‌ڵكوو بیرم كه‌وێته‌وه، ناچار جگێ پرسیارم ئاراسته كرد:
+نهۆ له كیهان گه‌ڕه‌ك ئاكنجین؟
_له گه‌ڕه‌كی (ناوه‌نداوا!). ڕۆژێ بێنه مێوانیمان. كه له ناوه‌ڕاستی شاره‌وه ته‌شریفتان هێنا، وه‌ختێ به ناوه‌نداوا ده‌گه‌ن پانتاییه‌كی فراوانی لێیه، له‌وێدا ڕاوه‌ستن و ڕێك به‌رانبه‌رتان له ناوه‌ڕاستی دره‌خته‌كانه‌وه خانوویێكی دارین ده‌بینن، ئه‌وه ماڵه‌كه‌ی منه. خراپ نییه لێ به‌داخه‌وه ژووری ناوه‌ڕاستی له ئانی باراندا چكه ده‌كات.
+كار و گوزه‌رانتان چتۆیه؟
_خراپ نییه، ناوه‌ندییه. له ناوه‌ڕاستی مانگی ڕابردوودا مامه‌ڵه‌یه‌كمان هه‌بوو، ده‌ڵاڵه‌كه كڵاوی نایه سه‌رمان! هاوار له ده‌ست ئه‌م ده‌ڵاڵانه، خوا نه‌كا كارت بكه‌وێته ده‌ستیان! هه‌ر لێی گه‌ڕێ...
+قوربان، ئێوه كه هێنده ناوه‌ندگۆن، بارودۆخی ئه‌م ڕۆژگاره به كوێ ده‌گا؟
_"ئاخر ئه‌مه بارودۆخ نییه تێی داین! ده‌بێ دۆخێكی ناوه‌ندی بێته ئاراوه. پێدڤییه هه‌ردوولا پێكه‌وه دانیشن، به جوانی گفتوگۆ بكه‌ن و دۆخێكی ناوه‌ندی قه‌بووڵ بكه‌ن، تا گوزه‌ران له‌مه‌ی هه‌یه خراپتر نه‌بێ و وه‌زعه‌كه كه‌مێ ئارام بێته‌وه. ئه‌سڵه‌ن ئه‌مه‌ی ده‌گوزه‌رێ هه‌ر له زه‌ره‌ری چینی ناوه‌ڕاسته! چینی سه‌ره‌وه چ كێشه‌یان نییه، چینی خواره‌وه‌یش له هیچ شتێ تێناگه‌ن، به‌ڵام هاوار له حاڵی چینی ناوه‌ڕاست! ئاخر كاكی من، گیانی من، ئه‌زیزی من، ژیان و مرۆڤی ئه‌م ناوه‌نده خۆ كه‌ره‌سته‌ی یاری نین، ئاخر..."
سه‌ری قسانم لی وه‌رگرت!
+ مه‌به‌ستتان چییه؟!
_نا نا... به‌نده مه‌به‌ستێكی دیاریكراوم نه‌بوو، نایه‌وێت له ناوه‌ڕاستی ئاریشه‌دا مژوڵی خه‌مڵاندنی به‌هاكان بین. ئه‌ز مرۆڤێكی خودان حاڵ و گوزه‌رانێكی ناونجیم، په‌یوه‌ندیم به كاروباری چ كه‌سه‌وه نییه، به‌ڵام له‌م ناوه‌نده‌دا دڵم به حاڵی ئه‌م خه‌ڵكه ده‌سووتێ!
+به‌هه‌رحاڵ، پێم خۆشه كاروبارتان باشه، ئینشاڵڵا باشتریش ده‌بێ.
_سپاس بۆ خوا هاوبه‌شه‌كه‌م مرۆڤێكی چاكه. نه گه‌نجه و نه پیر. ته‌مه‌نی ناونجییه، باڵای ناونجییه، بارودۆخیشی ناونجییه، به كورتییه‌كه‌ی گشت شتێكی ته‌واو ناونجییه!
+زۆرباشه، گه‌ر مۆڵه‌تم به‌ن من ئیتر ده‌بێ بڕۆم.
_منیش كارم هه‌یه، ده‌بێ بچمه دووكانێكی گوڵفرۆشی، هێندێ تۆوی گوڵ ببه‌م و له ناوه‌ڕاستی باخچه‌كه‌ماندا بیچێنم. له ڕاستیدا ده‌مویست بڵێم: "یه‌كێ له به‌دبه‌ختییه‌كانی ئێمه ئه‌وه‌یه، میانڕه‌وی به ئه‌ندازه‌ی پێویست له‌م وڵكه‌یه‌ی مه‌دا بوونی نییه!"
+ببورن، چیتان فه‌رموو؟!
_مه‌به‌ستی من ئه‌وه بوو پێویسته له‌سه‌رمان به‌وپه‌ڕی تواناوه هه‌وڵ بده‌ین كه‌لتووری میانڕه‌وی و ناونجیبوون له‌م وڵاته‌ماندا وه‌شان بكه‌ین. ئه‌سڵه‌ن بۆچی له زانستگه‌كاندا كۆرسی ناوه‌ندۆلۆگی ناخوێنرێت؟! باشه بۆچی گرۆیه‌ك میانڕۆی پسپۆر ته‌قه‌لای پێگه‌یاندنی جیلێكی ناوه‌ندۆلۆگیست ناده‌ن؟!
+ڕاست ده‌كه‌ن، هه‌ق به ئێوه‌یه.
ماڵاواییمان له یه‌كتر كرد و جوێ بووینه‌وه. له پشته‌وه بانگی كردم:
+به‌ڵێ
_هاواری كرد: له ناوه‌ڕاسته‌وه بڕۆ، له ناوه‌ڕاسته‌وه بڕۆ! پێش بكه‌وی، ده‌كه‌ویت و ملت ده‌بێته ژێرته‌وه. دوا بكه‌وی، ده‌ستت به هیچ ناگا. تا ده‌توانی له ناوه‌ڕاسته‌وه بڕۆ، له ناوه‌ڕاسته‌وه...