هه‌ڵوێستێك به‌رانبه‌ر ده‌ستدرێژییه‌كانی توركیا

ئه‌مڕۆ 1-8-2015 هێزی ئاسمانیی توركیا تۆببارانی ناوچه‌ سنوورییه‌كانی هه‌رێمی كوردستانی كرد و گوندی (زاركه‌لی) له‌ بناری قه‌ندیل كه‌وته‌ به‌ر ئه‌و هێرشه‌ دڕندایه‌نه‌ و ژماره‌یه‌ك هاوڵاتی بوون به‌ قوربانی.

   له‌ ئان و ساتێكدا كه‌ پرۆسه‌ی ئاشتیی نێوان توركیا و په‌كه‌كه‌ هه‌نگاوی باشی نابوو، به‌ڵام دوای هه‌ڵبژاردنی په‌رله‌مانی توركیا پرۆسه‌كه‌ زیانێكی گه‌وره‌ی به‌ركه‌وت و گرژی و ئاڵۆزی ڕووی كرده‌ په‌یوه‌ندییه‌كانی هه‌ردوولا.

   ئێمه‌ وه‌كو ناوه‌ندی بیری میانڕه‌و ئه‌و هێرشانه‌ی حكومه‌تی توركیا به‌ تیرۆر ده‌زانین و هیچ پاساوێك به‌ ڕه‌وا نابینن له‌و ده‌ستدرێژییه‌دا، جا ئه‌و كاره‌ هه‌ر هێزێكی دووره‌ دین بیكات یا حیزبێكی پاشخان ئیسلامیی وه‌كو داد و گه‌شه‌پێدان. ئه‌وه‌ی به‌ ئاشكرا ده‌بینرێت زوڵمێكی گه‌وره‌یه‌ به‌رانبه‌ر هاونه‌ته‌وه‌كانمان، چ له‌م دیوی سنوور بن یا ئه‌و دیوی، هیچ جیاوازییه‌كی نییه‌.

   هه‌روه‌ك هه‌ر هێزێكی سیاسیی كوردی و ده‌ره‌كی به‌ تاوانبار ده‌زانین كه‌ له‌م ساته‌دا له‌به‌ر به‌رژه‌وه‌ندییه‌كانی خۆی بێده‌نگی هه‌ڵبژێرێت، یاخود به‌ نه‌زانیی خۆی بووبێته‌ هۆی تێكچوونی ئه‌و پرۆسه‌ ئاشتییه‌ی كه‌ ئومێدێك بوو بۆ حه‌سانه‌وه‌ی كوردانی باكوور دوای شه‌ڕ و نائارامیی نزیكه‌ سه‌ده‌یه‌ك.