به‌ پێى به‌ڵگه‌نامه‌یه‌ك، ڕێكخراوى داعش به‌ نهێنی پلان داده‌ڕێژێت بۆ نزیككردنه‌وه‌ى "ئاخرزه‌مان" و كۆتایی هێنان به‌ژیان له‌ ڕێگه‌ى په‌لاماردانى هندستان و په‌لكێش كردنی ئه‌مریكا بۆ به‌رپاكردنى جه‌نگێكى جیهانى ئه‌تۆمی.
ئه‌و به‌ڵگه‌نامه‌یه‌ كه‌ به‌زمانى ئوردو نوسراوه‌و له‌م دواییانه‌دا له‌ ڕێگه‌ى كه‌سێكى پاكستانییه‌وه‌ كه‌ په‌یوه‌ندى هه‌یه‌ به‌جوڵانه‌وه‌ى تاڵیبان دزه‌ى پێكراوه‌ بۆ ناو ده‌زگاكانى ڕاگه‌یاندن له‌ ئه‌مریكا به‌ پێى ئه‌وه‌ى كه‌ له‌ ڕۆژنامه‌ى ده‌یلی مه‌یلی به‌ڕیتانیدا هاتووه‌.

بۆچون وایه‌ ئه‌م به‌ڵگه‌نامه‌یه‌ به‌ده‌ستى چه‌كدارانى ڕێكخراوى داعش نوسرابێته‌وه‌ كه‌تیایدا جه‌خت ئه‌كاته‌وه‌ له‌سه‌ر ڕاكێشانى چه‌كداره‌كانى جوڵانه‌وه‌ى تاڵیبان و ڕێكخراوى ئه‌لقاعیده‌ بۆ ناو ڕێكخراوى داعش به‌ ئامانجى دروست كردنى "خه‌لافه‌تى جیهانى".
ئه‌م به‌ڵگه‌نامه‌یه‌ جه‌خت له‌وه‌ ئه‌كاته‌وه‌ كه‌ ئاماده‌كارى كراوه‌ بۆ هێرشكردن سه‌ر هندستان و تیایدا هاتووه‌: "ئه‌گه‌ر وڵاته‌ یه‌كگرتووه‌كانى ئه‌مریكا و هاوپه‌یمانه‌كانى بڕیارى هێرشكردن بده‌ن، ئه‌و كاته‌ ته‌واوى نه‌ته‌وه‌ یه‌كئه‌گرێت و دواجار شه‌ڕى كۆتایی لێ ئه‌كه‌وێته‌وه‌".

هه‌روه‌ها ئه‌و به‌ڵگه‌نامه‌یه‌ باس له‌ پلانێكى داعش ئه‌كات بۆ هێرش كردنه‌ سه‌ر سه‌ربازه‌ ئه‌مریكیه‌كان له‌كاتى پاشه‌كشێیان له‌ ئه‌فغانستان و كوشتنى دیپلۆماتكاره‌ ئه‌مه‌ریكیی و به‌رپرسه‌ ئه‌فغانیه‌كان.
چه‌ند به‌رپرسێك له‌ئاژانسی هه‌واڵگى ئه‌مریكا به‌سه‌ر ئه‌و به‌ڵگه‌نامه‌یه‌دا چونه‌ته‌وه‌ و پێیانوایه‌ كه‌ نزیكه‌ له‌ ڕاستییه‌وه‌و به‌ پێى ئه‌و زمان و نیشانانه‌ى كه‌ له‌و به‌ڵگه‌ نامه‌یه‌دا هاتووه‌و تایبه‌ته‌ به‌ داعش.

راو ئینده‌رجیت وه‌زیرى به‌رگرى هندستان له‌ لێدوانێكى دا له‌ مانگى حوزه‌یرانى 2015 ڕایگه‌یاند كه‌ "داعش هێنده‌ پاره‌ى هه‌یه‌ كه‌ بتوانێت چه‌كى ئه‌تۆمی بكڕێت له‌ پاكستان". ئه‌م قسه‌یه‌ش له‌ كاتێكدا ئه‌كرێت كه‌ ڕێكخراوى داعش مانگى ڕابوردوو ڕایگه‌یاند كه‌ نزیكه‌ له‌وه‌ى كه‌ ببێته‌ خاوه‌ن چه‌كى ئه‌تۆمی.

و: به‌ختیار ئه‌حمه‌د ساڵح
سه‌رچاوه‌ : المركز الاوروبی العربی للدراسات.