لە عەرەبییەوە وەرگێڕانى: محەمەد حەسەن

بۆچى مریشکەکە لە شەقامەکە پەڕیيەوە، با ڕاگەیاندنەکان وێنەکەت بۆ ڕوون بکەنەوە, بزانە بیرمەند و زانا و سیاسەتمەداران چى لەو بارەیەوە دەڵێن:  

*سیگمۆند فرۆید: پەڕینەوەى مریشکەکە لە شەقامەکە ده‌ربڕی حەزێکى سێکسیى چه‌پێنراوه‌ لاى مریشکەکە، بۆ پەڕینەوە لە شەقام .
*ئیبن خەلدون: لاواز حەزى بە لاساییکردنەوەى بەهێزە و, ئەم مریشکەيش بە پەڕینەوەى لە شەقامەکە لاسایى نمونەیەکى بەهێزتر دەکاتەوە .
*پراگماتییەک: لە پشت پەڕینەوەى مریشکەکەوە سوودێکى ڕاستەقینە هەیە .
*سۆفیيەک: ئەم مریشکە بێ پەڕینەوەى لە شەقامەکە ناکرێ بگات بە مەقامى (موکاشەفە).
*ئەنیشتاین: ئایا ئەوە مریشکەکە بوو کە لە شەقامەکە پەڕیەوە، یاخود شەقامەکە بوو کە لە مریشکەکە پەڕیەوە، شتەکە ڕێژەییە و پشت دەبەستێت بە گۆشەنیگاى چاودێریکردنى تۆ بۆ ڕووداوەکە .
*داروین: پەڕینەوە لە شەقامەکە هەنگاوى داهاتووە لە زنجیرەى پەرەسەندندا، دواى دەرچوونى مریشکەکە لە هێلانەکەى .
*کارل مارکس: ئەى مریشکانى جیهان یەکبگرن، پەڕینەوەى مریشکەکەیش لە شەقامەکە هەنگاوێکى گرنگە لە پرۆسەى بنیاتنانى ژێرخانى کۆمەڵگەى كۆمۆنیستیدا .
*یەکێک لە زانایانى (جەبرییەکان): پەڕینەوەى مریشکەکە لە شەقامەکە شتێکى نووسراوە، چونکە مریشکەکە (مسیر)ە نەک (مخیر) و لەگەڵ ئەوەیشدا مریشکەکە دەزانێت کە بەرپرسیارە لە پەڕینەوەکەى .
*ئیسحاق نیوتن: مریشکەکە بوونەوەرێکە لە ناو سیستمێکى میکانیکیى زۆر ورددا و بێگومان پێویستە لە شەقامەکە بپەڕێتەوە .
*کۆمەڵەى مافى ئاژەڵان: مریشکەکە مافى سروشتیى خۆى بۆ هاتوچۆ مومارەسە کردووە .
*محمد حسنین هیکل: براى من سەیرم کە با شتێکى زۆر مەترسیدارت پێ بڵیم، ئەوەى لە شەقامەکە پەڕییەوە میسریەکان بوون و, ئەم شتەیشم لە کتێبى بیرەوەریيەکانمدا بە دۆکیومێنت لایە . 
*هەواڵەکە لە کەناڵى سی ئێن ئێن: مریشکێکى خۆکوژ لە شەقامەکە پەڕییەوە .
*هەواڵەکە لە کەناڵى جەزیرە: مریشکێکى شەهادەتخواز (استشهادى) لە شەقامەکە پەڕییەوە .
*هەواڵەکە لە ماڵپەڕەکاندا: بەیاننامەیەک لە لایەن ٣٦ زاناى ئایینیەوە کە تێیدا داوا لە مریشکەکە دەکەن لە بڕیارى پەڕینەوە پەشیمان بێتەوە . 
*شکسپیر: پەڕییەوە یان نەپەڕییەوە لە شەقامەکە؟ ئەمە پرسیارەکەیە .
*مەهاتما گاندى: پێویستە هەموو مریشکێک بە شێوەیەکى ئاشتیخوازانە لە شەقام بپەڕێتەوە و, پەنا نەبات بۆ توندوتیژى و, زۆر گرنگە کە تەشییەک (گاندى بە تەشى جلى خۆى ڕێساوە) بەدەستبهێنێت . 
*جۆرج بۆش: ئێمە ئەوەمان بەلاوە گرنگ نیە کە ئایا مریشکەکە لە شەقامەکە پەڕیوەتەوە یان نا، ئێمە تەنها گرنگى بەو پەڕینەوەیە دەدەین کە خؤمان ڕێگەمان بە بەکارهێنانى داوە و، بەوەى ئایا مریشکەکە لەگەڵماندایە یان دژمان؟ و لەم بابەتەیشدا هەڵوێستێک لە نێوان ئەو دوانەدا بوونى نییە . 
*ئیڤان پاڤلۆڤ: لەوبەرى شەقامەکەوە وروژێنەرێکى نامەرجى (unconditioning) دیارە کە وا لە مریشکەکە دەکات بە پەڕینەوە لە شەقامەکە وەڵامی ئه‌رێ (response) بداتەوە . 
*بیل گەیتس: هەستاوین بە پەرەپێدانى پرۆگرامێک بۆ ئاسانکردنى پەڕینەوەى مریشکەکە لە شەقامەکە، ئەمەیش یارمەتیی مریشکەکە دەدات بۆ بەسەربردنى کاتێکى زیاتر لەسەر کۆمپیوتەر .
*پێشکەشکارێکى بەرنامە سیاسییەکان: ئەو نهێنییەى کە مریشکەکە دەیشارێتەوە حەقیقەتى پیلانى ئەنفلۆنزاى باڵندەیە، لە کاتێدا دەیانەوێت وامان تێیگەیەنن کە مریشک هەر بە سروشتى خۆى گەمژەیە .


:سه‌رچاوه‌
دەقە عەرەبیەکە بە سوپاسەوە لە پەیجى بەڕێز  ناجح سلهب وەرگیراوە .