یه‌كێتیی زانایانی ئایینی ئیسلامیی كوردستان رایده‌گه‌یه‌نێت پێویسته‌ ده‌ستوور رێگری بكات له‌ هه‌موو هه‌وڵێك كه‌ ببێته‌ مایه‌ی توندڕه‌وی و تیرۆر و تێكدانی پێكه‌وه‌ژیان، جا به‌ناوی ئیسلام یان مه‌سیحی یان ئێزدی یان هه‌ر ناوێكی تر بێت.

له‌ په‌یامێكدا كه‌ ئاراسته‌ی‌ پێنج حزبی‌ هه‌رێمی‌ كوردستانی كردووه‌ یه‌كێتیی‌ زانایانی‌ ئایینی‌ ئیسلامیی‌ كوردستان رایده‌گه‌یه‌نێتت: "وه‌ك به‌ڕێزتان ئاگادارن ئێستا لیژنه‌ی نووسینه‌وه‌ی ده‌ستووری هه‌رێمی كوردستان سه‌رقاڵی كاره‌كانیانن و یه‌كێك له‌و ته‌وه‌رانه‌ی قسه‌وباسی لێوه‌ ده‌كرێت بابه‌تی (پێگه‌ی ئایین)ه‌ له‌ ده‌ستووره‌كه‌دا، به‌و پێیه‌ی ئێوه‌ به‌شێكن له‌ پێكهاته‌كه‌ی لیژنه‌ی نووسینه‌وه‌ی ده‌ستوور، ده‌مانه‌وێت ئه‌وه‌ رابگه‌یه‌نیین كه‌ ئێمه‌ له‌ 28/6/2015 سه‌رنجه‌كانی خۆمان داوه‌ته‌ لیژنه‌كه‌تان".

له‌ په‌یامه‌كه‌شدا ئه‌وه‌ش هاتووه‌: "پێویسته‌ ده‌ستووری هه‌میشه‌یی هه‌رێمی كوردستان پێناسی دروستی كوردستان بێت‌، به‌ روونی گوزارشت له‌ ناسنامه‌ی ئایینی خه‌ڵكی كوردستان بكات، كه‌ زۆرینه‌ی خه‌ڵكی كوردستان موسڵمانن. هه‌روه‌ها گوزارشت له‌ ته‌واوی پێكهاته‌كانی دیكه‌ی هه‌رێمی كوردستانیش بكاته‌وه‌. هه‌روه‌ها شه‌ریعه‌تی ئیسلام سه‌رچاوه‌یه‌كی سه‌ره‌كی یاسادانان بێت، رێگه‌ له‌ ده‌رچوونی هه‌ر یاسایه‌ك بگرێت، كه‌ پێچه‌وانه‌ی نه‌گۆڕه‌كانی ئیسلام بێت، هه‌روه‌ك ئازادی ته‌واویش بداته‌ سه‌رجه‌م پێكهاته‌ ئایینیه‌كانی دیكه‌ی كوردستان".

 ئه‌وه‌ش خراوه‌ته‌ڕوو: "پێویستیشه‌ ئه‌م ده‌ستووره‌ به‌توندی رێگری بكات له‌ هه‌موو هه‌وڵێك كه‌ ببێته‌ مایه‌ی توندڕه‌وی و تیرۆر و تێكدانی پێكه‌وه‌ژیان، جا به‌ ناوی ئیسلام یان مه‌سیحی یان ئێزدی یان هه‌ر ناوێكی تر بێت".

باس له‌وه‌شكراوه‌: "ده‌مانه‌وێت ئه‌وه‌ بیری به‌ڕێزتان بێنینه‌وه‌، كه‌ له‌ ده‌ستووری وڵاته‌ ئیسلامییه‌كان پێگه‌ی ئایینی ئیسلام پارێزراوه‌، كه‌ له‌هه‌مانكاتدا وڵاتی مه‌ده‌نی‌و حوكمێكی مه‌ده‌نییان هه‌یه‌، بۆیه‌ پێگه‌ی ئیسلام له‌م ده‌ستووره‌دا نابێ‌ كه‌متر بێت له‌وه‌ی له‌ ره‌شنووسی ده‌ستووری هه‌رێمی كوردستان".