ناوه‌ندی هزریی (بیری میانڕه‌و) له‌ ژێر دروشمی (له‌ پێناو چه‌سپاندنی فیكرێكی باشتردا) خێوه‌تگه‌یه‌كی چوار ڕۆژه‌ی له‌ به‌رده‌ڕه‌ش بۆ گه‌نجانی زانكۆ و سه‌رووی زانكۆی ناوچه‌ی گۆران و به‌رده‌ڕه‌ش ڕێكخست.

   خێوه‌تگه‌كه‌ له‌ ڕۆژی 22/7 ده‌ستی پێكرد و سه‌رله‌به‌یانی ڕۆژی 26/7 به‌شداربووان ماڵئاواییان له‌ یه‌كتر كرد، به‌شداربووان له‌ شار و ناحێكانی (دهۆك، زاخۆ، ئاكرێ، به‌رده‌ڕه‌ش، كه‌له‌كچی، دینارته‌، شیلادزێ و به‌رده‌ڕه‌ش)ه‌وه‌ هاتبوون و به‌شی زۆریئه‌رك و ماندووبوونی ئیداریی خێوه‌تگه‌كه‌ش له‌ ئه‌ستۆی (لقی به‌رده‌ڕه‌شی یه‌كگرتووی ئیسلامیی كوردستان) و (لقی ئاكرێی ڕێكخراوی گه‌شه‌پێدانی قوتابیانی كوردستان) بوو.

   سه‌رباری وتاره‌كان كه‌ ته‌وه‌ری سه‌ره‌كییان چه‌مكی (میانڕه‌وی) بوو، له‌ پێناو یه‌كترناسین و تێكه‌ڵاوی زیاتری به‌شداربووان چه‌ند چالاكییه‌كی تری وه‌كو سه‌رگه‌رمی و گقتوگۆی كراوه‌ ڕێكخرا. به‌ گوته‌ی زۆرینه‌ی به‌شداربووان دوای ڕاپرسییه‌كی گشتی، گۆڕانكاری فیكرییان لا دروست بووه‌ و ده‌ستخۆشی خۆیان ئاراسته‌ی ناوه‌نده‌كه‌ كرد و هیوای به‌رده‌وامییان بۆی خواست.

به‌ڕێوه‌به‌ری یه‌كه‌می خێوه‌تگه‌كه‌ و به‌رپرسی گشتیی ناوه‌ندی بیری میانڕه‌و (قانع خورشید) له‌ دیواری فه‌یسبووكه‌كه‌یه‌وه‌ ئاوه‌ها هه‌ستی خۆی له‌باره‌ی خێوه‌تگه‌كه‌وه‌ ده‌ربڕیوه‌:

"سوپاس بۆ خواوه‌ندی مه‌زن خێوه‌تگه‌ی ناوه‌ندی بیری میانڕه‌و له‌ به‌رده‌ڕه‌ش، له‌ ژێر ناونیشانی (به‌ره‌و چه‌سپاندنی فیكرێكی باشتر)، به‌ هاوكاریی لقی به‌رده‌ڕه‌شی یه‌كگرتووی ئیسلامیی كوردستان و لقی ئاكرێی ڕێكخراوی گه‌شه‌پێدانی قوتابیانی كوردستان له‌ 22/ 7 تا 25/ 7 سازكر ...

ڕاستییه‌كه‌ی له‌و ڕۆژه‌وه‌ هاتووینه‌ته‌وه‌ به‌ نیازم ده‌رباره‌ی ئه‌و ڕووداو و به‌سه‌رهات و باسانه‌ شتێك بنووسم و هیچم پێ نانووسرێت، ئێستایش ته‌نیا وه‌ك دڵخۆشكردنی دۆستان ئه‌م چالاكییه‌ی ناوه‌ندی بیری میانڕه‌و ده‌نووسمه‌وه‌، ده‌نا هیچم نه‌ده‌گوت، ئاخر خۆ گشت شتێك بۆ ته‌عبیرلێكردن ناشێت، فرمێسك و ئه‌وین و دڵبه‌ندی و فیداكاری نانووسرێنه‌وه …

چ بڵێم و باسی چ بكه‌م؟

باسی فیداكاریی و خاكیبوون و بۆ خوا سوڵحانی برایانی به‌رده‌ڕه‌ش، كه‌ ماڵ و حاڵ و وه‌خت و ئیسراحه‌تی خۆیان بۆ ماوه‌ی پێنج شه‌و و ڕۆژ خسته‌ خزمه‌تمانه‌وه‌؟

یا باسی په‌ژاره‌ و هه‌وڵه‌كانی سه‌یدا (حه‌كیم)ی هاوڕێم له‌ ئاكرێ و دڵگه‌رمییه‌كانی سه‌یدا (كاظم)ی به‌رده‌ڕه‌ش كه‌ به‌ دوعا و بزه‌كانی دڵی پڕ كردم له‌ شادی؟ یا گه‌شانه‌وه‌م به‌ دیداری (پاسه‌وان)؟

باسی دڵه‌ڕاوكێ و غه‌مخۆری و چاوه‌ڕوانی و لێبڕانی هاوڕێ شیرینه‌كانی كه‌لارم؟

یا چیرۆكی گورج و گۆڵی و ڕووحسوكی هۆشه‌نگ كه‌ به‌ ته‌له‌فوونێكی چه‌ند چركه‌یی له‌ كۆیه‌وه‌ خۆی گه‌یانده‌ حجر الأسود و تا وێنه‌یه‌كی خۆی ده‌گیرا سه‌د وێنه‌ی له‌ ئێمه‌ ده‌گرت !

داستانی گه‌یشتنی یه‌كه‌م وه‌جبه‌ی قوتابیان و ڕوانینم له‌ چاره‌ی پاك و ڕه‌نگی شێواویان و ترسیان له‌ ناسینی ده‌سته‌یه‌كی نامۆ و بێگانه‌؟

یا به‌سه‌رهاتی پێنج شه‌و و ڕۆژی پڕ ڕووداو و به‌رزی و نزمی و تێكه‌ڵبوونی شه‌ڕ و ئاشتی، شین و شایی، فیكر و فه‌ن، كاری جدی و قسه‌ی گاڵته‌ و ڕۆندك و قاقای پێكه‌نین؟ !

چیتان بۆ بگێڕمه‌وه‌؟

خوێنی گه‌رمی گه‌نجانی ژیر و چالاكی بادینان: دهۆكی بووك، زاخۆی ده‌لال، ئامێدی و شیلادزه‌ی ڕه‌نگین، ئاكرێ و دینارته‌ و قه‌سرۆكی ئازیز، یا دڵسۆزی و دڵگه‌رمیی لاوانی كه‌له‌كچی و به‌رده‌ڕه‌ش؟
چی باس بكه‌م؟

باسوخواسی گه‌رمی فیكر؟ ده‌نگی پڕ سۆز و خۆشی زیكر؟ تاوتوێكردنی قسه‌ و باس؟ یا ماندووبوون و كه‌وتنی چه‌پ و ڕاس؟ !

به‌م خێوه‌تگه‌ پڕ حه‌ماسه‌ و به‌م كاره‌ جوان و ناوازه‌، وا هه‌ست ده‌كه‌م هه‌نگاوێكی گه‌وره‌مان نا و باری سه‌ر شانمان قورستر بوو، له‌ خوا ده‌خوازم هه‌روه‌ك پیشوو به‌ره‌كه‌تی خۆیمان لێ نه‌بڕێت و به‌رده‌وام ده‌ستمان بگرێت، له‌ هاوڕێیانیشم چاوه‌ڕێم هه‌ست به‌ ئه‌ركی خۆیان بكه‌ن و له‌مه‌ به‌ دوا ڕێگه‌ نه‌ده‌ن سارد و سڕی و سستی و شڕی ڕوو بكاته‌ ناخ و كاریان و له‌ جاران گه‌رموگوڕتر بن. هه‌روه‌ك ئومێدمه‌ ئه‌و گه‌نجانه‌ی گۆران و بادینان، كه‌ به‌شداربوون له‌ خێوه‌تگه‌ خاوه‌ن واده‌ و وه‌فا بن و له‌ دوعای خێر و ئه‌ڤینی به‌تین له‌ بیرمان نه‌كه‌ن و مه‌شخه‌ڵی پڕ نوور و ناری ئه‌و فیكره‌ پاك و بێگه‌رده‌ بگه‌یه‌ننه‌ گشت ناسیاوانیان و ده‌ڤه‌ری پڕ فه‌ڕی خۆیان ئاوه‌دان بكه‌نه‌وه‌ .
قسه‌م زۆره‌ و توانای گوتنیانم نییه‌ . "