نەمویست وەک ئەوەی کە باوە: "کۆمەڵێ وێنەی خۆم و ئەوانەشی لەتەکیانەوە بووم" دابنێم و لەژێر شادێڕی «بەشداریکردنم لە نۆیەمین کۆڕبەندی هاوسانی» پۆست بکەم. ناڵێم وەها کارێک خراپە، ئەمما من بەم جۆرە دەدوێم، هیواخوازم سوودێک بگەیەنم:
مرۆڤ، بەدیهێنراوێکە، هێندەی عاشقی موعجیزە و ڕووداوی سەرسوڕهێنە، شیفتەی شتگەلێکە بێ ماندووبوونی فکر و جەستەی وە دەستی بخات، کەمتر دڵخۆش دەبێت بەو حەدەسانەی خۆی دەیانخولقێنێت و دەستی هەبووە لە لەدایکبوونیاندا.
ئەوەندەی بەکارەکانی شەیتان سەرسامین، ڕوبعێکی نیعمەتێکی خوا فێنکایەتی بەدڵماندا نایەتەنێت! هێندە لاواز و بێدەسەڵات خۆمان دەردەخەین پێمان وایە جنۆکەیەک لە خودی خۆمان زیاتر دەسەڵاتدارە بەسەر بوونییەتی خودی خۆمانەوە، لە کاتێکدا تاکە مەخلووقین خوا بەخششی 'ویست'ـی بە ئێمە داوە.
ئاخر (پارچە کاغەزێک، نووشتەیەک، تۆپەڵێ موو،...)ـی ساحیرێکی هیچ لەباراندانەبوو کەی بووە زاڵ بێت بەسەر منێکدا کە گەورەترین پەیامی خودایم هەڵگرتە و خۆم خستۆتە ژێرباری!
پێم نایەژن باخچەی دڵ کە 'ئیمان' گوڵی بێت، بە چ کلۆجێک بۆنی ناخۆشی شەیتان و ئەجیندە بۆگەنی بکات؟!
ئێمەی مرۆڤ لەوە بانترین ببینە کۆیلەی وەهم و خوڕافەی کۆمەڵێک دیدی لۆچاوی و ئاڵۆزی دروستکراوی دەستی ئەوانەی بوونەتە بازرگان و بە ناوی ئایینەوە ئارامیمان پێ دەفرۆشن.
موسوڵمانی ئێستا حەزی لە چوونە گەشتە بۆ نێو 'مەملەکەتی شەیتان' پیاسەی ناو کۆڵانەکانی، مەلەی ناو ئاوی بۆگەنی، ترس و لەرزی هەورەبروسکەکانی، بێئارامی و قەلەقیی ناو کافتریاکانی نادات 'بەڕامانێک'ـی کەمیی ناو 'بەحری نوور'ی خودایی!
تا بێتاوانیی خۆمان بسەلمێنن، یاخود ددان بەوە دانەنێین ئێمەش دەشێ هەڵە بکەین و لە ڕێ لامان داوە، خوڕافەکان دەکەینە بیانوویەک و خۆمانی پێ دەدزینەوە، ئیتر کێشەیەک نییە هەرچییەک دەرکەوتەکەی بێت!
ژنێک کە تێناگات دەشێ جارجار (تووڕە، بێپارە، قەلەق، بێسۆز ...) بیت گوژ بڕوا بەیەکێک دەکات کە گوایە جادووت لێ کراوە و بۆیە تۆ وەها حاڵەتانێکت بۆ پەیا دەبێت.
خوێندکارێک قبووڵی ناکات، کە تۆ زۆر هەوڵ دەدەیت و دەشێ مێشک و دەروونت ماندووبن و ئەوەندە توانایەت هەیە گلەیی ئێستا و ویستی خوایە تۆ دەبێت ئەوندە نمرەیە بێنیت، دێت دێوەزمەی 'حەسادەت و چاوەزار' وەک بتێک دەتاشێت و لە خۆی دەکاتە خودا و گوایە کاریگەری لەسەر دروستکردووە و خەتای ئەوە؟!
'چۆلەکە' ماڵ و لانەی هەر سەر لقی دارەکانە، ئیتر بۆ کە دەجریوێنێت لە ماڵتان لەخۆتی دەکەیتە خوڕافە و ئاماژەیەک بۆ هاتنی میوان؟! 'پژمین' لە کردارێکی جەستەیی لەولاوە هیچتر نییە، کەچی تۆ کردووتە بە دێوێکی گەورە و گوایە کە لەڕێی سەفەر تووشبوویت دەبێت بگەڕێیتەوە و نەکا تووشی ڕووداوێکی ناخۆش بیت!
بەداخەوە ئێستا ئەوەندەی لەناو خوڕافە و نەریتی گۆج و گێڕدا دەژین هێندە لەناو حەقیقەتی ژیان هەناسە هەڵنامژین. شەیتان و خوڕافە ئێستا داپۆشەری ژینی ئێمەیە، وەختێکیش کە دڕا لەباتی ئەم جلانە داکەنین و عەبای حەقیقەت لەبەر بکەین، دەچین بۆلای پینەچییە هەنگوینفرۆش و مسکفرۆشەکان، ئەوانیش بە دەزووی خوڕافە دووبارە بۆمان تەقەڵداو دەکەن.
گەرەکمانە لەو خەوە ڕابین چیدی نەچینە سەر حەوزی لێڵاوکراو دەموچاومان بشۆین، چیدی بەخاولی چڵکن و بۆنخنکی وەهم وشکی نەکەینەوە و هەمدیس خەو بمان باتەوە. با ئەمجارە کە هەستاین بەرەو کانی ڕوون و بێخەوشی ئیمان بچین، لەڕێگا ئەو -حەوزانەی کە بەس ڕوویان ڕازاوە و ناوییان ئاڵۆزە- چیدی فریومان نەدەن. با دەسنوێژێک بشۆرین و غوسلی نەزانین لە حەمامی دڵنیایی دەربکەین و هەرچی چڵک و چەپەڵی خوڕافەی هەیە بڕواتە نێو مەنهۆڵی سەردەمی بێئاگاییمانەوە. دووبارە دیدی نوێمان هەبێت بۆ ژیان و خۆمان لەم هەموو دێوەزمە و دەعبایە هیچە نەجات بدەین.
ئەوەی ڕێکخراوی هاوسانی کردی شۆڕشێکە م. قانع خورشید وتەنی: «ڕمانی شاخێکە ئەم کارەی ئێمە.» بەڵێ! خورافە بۆتە شاخێکی گەورە لە دەشتی مێشک و دڵی زۆربەی خەڵکی ئەم سەردەمە. لێیان بۆتە پەردەیەکی ئاسنین و ناهێڵن حەقیقەتی ژیان و دینی ئیسلام چۆنە ئاوای ببینن. ئەوەی جێی دڵخۆشییە هاوسانی بەهەرەوەزی کۆمەڵە کەسانێکی لێهاتوو و شارەزا 'کوین و بارییەی' خۆی بەم سێ ڕۆژە تاودایە و هەوڵی شکاندن و دڕاندنیانی دا. گرنگ نییە کەی بەتەواوی ئەو شاخە دەڕمێت؟ دواجار ڕۆژێک دێت خونچەکان هەر دەپشکوێن.