بە خامەی زانای پایەبەرز مامۆستا سەید ئەحمەد سەید عەبدولوەهاب پێنجوینی

خوێنەری ئازیزم! ئەم كتێبەی بەردەستت هەوڵێكی سەركەوتووانە و باسێكی بابەتییانە و، لەدەرگادانێكی بوێرانەی باس ‌و خواسێكی تاڕاددەیەك نایاب ‌و كەم لەسەرنووسراوە، كە لەلایەن لاوێكی ئیماندار و نیازپاك ‌و پێنووسپاكەوە ئامادەكراوە، كە خۆی لە ناو جەرگەی لاوان ‌و چەقی خوێندنگاكانی كوردستاندا دەژی ‌و ژیاوە و، بە گوێی خۆی زۆر شتی سەیر و سەمەرەی بیستوون و، بە چاوی خۆی زۆرێكی لـێ‌ دیتوون، بۆیە شیاوی ئەوەیە بەوپەڕی نیازپاكی ‌و دڵسۆزییەوە قەڵەمەكەی ڕابدات ‌و لەسەری بدوێ‌ و، ئەم كتێبە بێنێتە بوون ‌و ناو كتێبخانەی كوردی .

كاكە قانع زۆربەی زۆری ناوەڕۆكی ئەم كتێبەی بە خۆی بۆ خوێندمەوە و منیش بێجگە لە گوێ‌ لێگرتنی هەرچیم زانی پێم وت ‌و ئاراستەم كرد .

ئەتوانم بڵێم: ئەم باسە باسێكی تێر و تەسەلە ‌و، چەند بڵێی دادپەروەرانە و بابەتیانە و بەراوردكراوە، بابەتێكی هەمەلایەنە و، بەرەو لایەك یان بۆچوونێك نەیشكاندۆتەوە و لایەنگریی ڕێباز و ڕێرەوێكی تایبەتی نەكردووە، بەڵكو تەنها دوای بەڵگەی شەرعی و عەقڵی كەوتووە و ئەو بەڵگانەی كردوونەتە چاوساغ ‌و پێشەوای خۆی ‌و باسەكەی ‌و، موناقەشەی هەموو دید و بۆچوون ‌و بەڵگەكانی تری كردووە بە شێوەیەكی زانستییانە .

من بزانم تاكو ئێستا بە زمانی شیرینی كوردی باسێكی ئاوا بەراوردكراو و بەڵگەداری گەرم ‌و گوڕ و جێگای مشت‌ومڕ نەنووسراوە، باسێكی ئاوا تاڕاددەیەك هەستیار و بڤە كە لاساییكردنەوەی پێوە دیار نەبێت ‌و نووسەرەكەی تەنها پشتی بە بەڵگەی هەمەچەشن ‌و بەراوردكردن بەستبێ‌ ‌و خاڵی لەسەر هەموو پیتەكان دانابێت لە كتێبخانەی كوردیدا بەرچاو ناكەوێ‌، بەڵام بە شێوەی (عەبەسی)‌و گواستنەوەی دیدی ئیباحییەكان، ئەوە زۆرن لە نامیلكە و باس ‌و بابەتی لاپەڕەكانی گۆڤار و ڕۆژنامەكان، كە ئەوە زیاتر قەیران بۆ كیژ و كوڕانمان دروست ئەكات ‌و ئاراستەیەكی هەڵە و كوشندەیان ئەكات و زیاتر لە جددییەت ‌و مەردایەتی دووریان ئەخاتەوە، بۆیە من بە شانازییەوە گوێم لە كاكە قانعی لاوی پاك ‌و خوێنگەرم گرت ‌و، ئەم پێشەكییەشم بۆ نووسی ‌و داوای سەركەوتنیشی بۆ ئەكەم ‌و چاوەڕوانی هەوڵا ‌و هیممەتی تریم !

بە ڕاستی من بە پێویستی ئەزانم كە خەڵكانی ئیماندار و نیازپاك لەسەر ئەم باسە هەستیار و گرنگانە بنووسن ‌و، وازیان لێ نەهێنن بۆ ئیباحی ‌و قەڵەمە ژەهراوییەكان، كە ئەیانەوێ‌ باسی جنس بكەنە كێشە و مادەگەرایانە بمانخزێننە ناویەوە و دەیان قەیرانی بەرهەمی ئینحرافی جنسیمان بۆ بكەنە دیاری ‌و تووشی نەخۆشییە دەروونی ‌و خێزانی ‌و جنسییەكانی رۆژئاوامان بكەن، لە كاتێكا لە ئایینی ئیسلامدا شتێك نییە بە ناوی كێشەی جنسی -بەم شێوە و جۆرانەی لە جیهانی مادەگەراییا هەیە ‌و هەزاران قەیرانی تری لێ كەوتۆتەوە- بەڵكو بە زەواجی شەرعی ‌و ئاسانكارییە فیقهییەكان ئەم باسە خۆی چارەسەرە و مێژوویش شاهیدە، بەڵام كاتێ‌ كۆمەڵگە لە بەها رەوشتی ‌و شەرعییەكان لادەدات ‌و باوەش ئەكات بە عورف ‌و باوی خێڵەكی و نەفامانەدا و، ئەوانە ئەكاتە یاسا و بەرنامەی ژیانی كۆمەڵایەتی، یان باوەكانی لەدەرەوەهێنراوی كۆنی بەناو تازە و مردووی مرێنەری بەناو زیندوو و پێشكەوتووخوازانە... ئەوە ئیتر شتێكی سروشتییە كە جنس بێتە كێشە و كێشەگەلی تری لێ پەیدا ببێ‌ ‌و سەدان جەنجاڵی ‌و دەرد و سەرقاڵی بۆ لاوان ‌و گەل دروست بكات، كە ئەوەش بۆ خۆی باجی لادانە لە بەها ئەخلاقییەكان ‌و دەرچوونە لە سروشتی خوایی ‌و یاسا شەرعییەكان .

ئەبێ‌ هەموو دەزگا ئایینی ‌و كۆمەڵایەتی ‌و زانستی ‌و راگەیاندنەكان هاوڕا و هاونیاز و هاوسەنگەر بن بۆ پارێزگاریكردن لە بڕبڕەی پشتی میللەتمان كە لاوەكانمانن، لێ نەگەڕێین بە ئاقاری هەڵەدا ببرێن و یاری بە گەنجێتییەكەیان بكرێ‌ ‌و گڕكانی جینس بیانسووتێنێ‌ ‌و پرۆژە ژەهراوییەكانی بێگانە ‌و بێگانەپەرستان بەربادیان بكەن .

جارێكی تر دەستخۆشی لە كاكە قانع ئەكەم بۆ كتێبەكەی ‌و، سەرنجی لاوانمان ڕائەكێشم بۆ چاك خوێندنەوە و بەهرەوەرگرتن لە ناوەڕۆكەكەی. ئیتر هەموو كچان ‌و كوڕانمان پارێزراو بن لە فێڵا ‌و فێڵبازان !

ئەحمەد سەید عەبدولوەهاب