نووسینی: د.هێمن عومه‌ر خۆشناو

نووسینەوەی مەرگەسات و دوو قسە!!

کورد وەک چۆن لە زۆر بواردا لە گوێی گادا خەوتووە، یان خەوێندراوە، لە نووسینەوەی مێژووی زارەکیی کارەساتەکانیشیدا یان هێڕە، یان هێڕکراوە، ئەگەرنا بۆ بێ باک بێ باک، لە ئاستیاندا هەڕڕەی لێوەدێ!؟

ئاخر بە تەنیا لەبارەی یەک شەڕ، ئەویش شەڕی ڤێتنامە، پتر لە 30هەزار کتێب بنووسرێ، ئێمەش ڕووداوەکانمان زۆرو قەڵەممان کۆر، مەرگەساتمان هەزاران لافاو، بیرکردنەوەمان چۆڕەئاو، وەستاو لەبلەبانی قسانین و کۆلەواری دەستانین! ئەگەرنا دەبوا بۆ هەڵەبجە، بۆ ئەنفال، بۆ کۆڕەو، بۆ شەڕی براکوژی، بۆ دیلەکانی شەڕی عێراق و ئێران، بۆ ژانی مردنی ئێزیدییەکان، بۆ مێژووی گەلی ستەملێکراومان، دوو هەنگاومان ناباو بەس:

یەک: هوردو درشتی بەسەرهات و ڕووداوەکانمان بە نووسین و بە زمانی کوردی پاراستبا.

دوو: هەموو هەوڵێک دراباو توانا بە گەڕ خرابان، ئەم مەرگەساتانە بۆ زمانەکانی دونیا وەرگێڕدرابان.

دەبوایە لەو 25ساڵەی ڕۆیشت؛ وەزارەتی ڕۆشنبیری داری لەسەر بەرد دانەنابا، کلیپ و گۆرانی نەچڕیبا، شایی و لۆغانی نەگێڕابا، شایەرو چاوەشی پف نەدابان، پارەو پوولی بە بەر پێیان وەرنەکردبا، سەدان و هەزاران داهێنەری قاویلکەو ناوک بۆشی بە گوێی دونیا نەدابا، لۆقنتەو چایخانەی نووسەرانی لە هەموو شارەدێ و میرەدێیان دانەنابا، هەر فکری بۆ کەناڵی تەلەفزیۆنی گۆرانی و چێشت لێنان و چەپڵەلێدان و فیتەفیت و چەلەحانێ و دمک دمکانێ و درامای بێ سەروبەرو عاجباتی نەچووبا!

ئەوجارەکینێ ئەگەر 30هەزار کتێبیشمان نەبا؛ تەنیا سێ هەزار کتێب با، ئەوا دەستمان دەخستە بن سەرمان و هێندەی جغارەکێشێک، نێبەکی سەرخەوێکمان دەشکاندو دەستێکمان بە ڕدێنێ خۆ دادێناو چاوێکمان لە ئاسمانێ دەکردو پاشی شوکری باری تەعالان، بە یەک دەنگ دەمانگوت:

ئەشهەدو ئێمەش میللەتین!

بەڵام داری خۆزگە بێ بەرەو تازەش فت.

بنۆڕێ میللەتان چ هەستێکیان لەبەرامبەر ستەم و مەرگەساتەکانیان هەس:

مەلای گەورە دەڵێ: لە جەنگی یەکەمی جیهانیدا، دوای شەڕ ڕاوەستان، لەلای مهابادێ زیافەتێک بۆ سوپا ڕێکخراوو، سفرەیان بە شەڕاب و ئارەق ڕازاندبۆوە، زۆر کەیفیان هاتبوو، دەیانەویست ئەو ماوە بە کەیف و سەفا بەڕێ بکەن.

فەرماندە دەستی بۆ جامی شەڕاب برد بیخواتەوە، لەو وەختەدا هەواڵ هات شەڕ دەستی پێکردەوە. ئیدی فەرماندە بڕیاری دا کەس کەیف و سەفا نەکاو جامی شەڕابی فڕێداو گوتی شەڕە شەڕ! ناکرێ کەیف بکەین و گەلیش چاوی لە ئێمە بێ!

وەرە هۆش و بیرکردنەوەمان لەگەڵ میللەتانی تر بەراوردبکەین و ئاخ بۆ ڕۆشنبیری و ناسنامەو زمان و زانکۆو قەڵەم و بڕوانامەو لاف و گەزاف و لووت بەرزیمان هەڵنەکێشین!!!

 له‌ فه‌یسبوكی نووسه‌ره‌وه‌ وه‌رگیراوه‌