نووسینی: زانیار عه‌لی
  
له‌و ماوه‌یه‌ی که‌ خه‌ریکی خوێدنه‌وه‌ی ئه‌و کتێبه‌ بووم، له‌گه‌ڵ خوێندنه‌وه‌ی هه‌ر ده‌قێکی کتێبه‌که‌، دوای گرنگیدان به‌ ناوه‌ڕیکی قسه‌کان و، تاوتوێکردنی له‌گه‌ڵ خۆما، سه‌رنجێکی ترم له‌سه‌ر زمانه‌که‌ی بوو. زمانی فاروق وه‌ک ئاشکرایه‌ زمانێکی تا ڕاده‌یه‌ک وشک و بێ ئاوه‌، نووسه‌ر که‌ ده‌نووسێت، بۆ ته‌واوی خه‌ڵکی ده‌په‌یڤێت، بۆ تێر کردنی خوێنه‌ر ده‌دوێت له‌مه‌ڕ ئه‌و پرسیارانه‌ی بۆی دروستبووه‌، ئیشی نووسه‌ر ئه‌وه‌یه‌ وه‌ڵامی پرسیاره‌کانی خوێنه‌ر بداته‌وه‌، یان به‌ پێچه‌وانه‌وه‌ چه‌ن پرسیارێکی لا بووروژێنێت، نووسه‌ر چۆن خۆی لای خوێنه‌ر خۆشه‌ویست ده‌کا؟ چۆن وا له‌ خوێنه‌ر ده‌کا بکه‌وێته‌ ژێر کاریگه‌رییه‌وه‌؟ به‌ دڵنیاییه‌وه‌ له‌ ڕێگه‌ی نووسێنێکی به‌ چێژ و قسه‌ هه‌ڵگر، جۆره‌ نووسینێک خوێنه‌ر لێی تێ بگا و له‌گه‌ڵ وه‌رگرتنی چیژ له‌ به‌رهه‌مه‌که‌ی، له‌ هه‌مان کاتدا شتێکی لێوه‌ وه‌ربگرێ، که‌ بتوانێ تێڕوانینێکی خۆی له‌سه‌ر بنووسێ، لێ به‌ پێچه‌وانه‌وه‌ فارووق بۆ کۆمه‌ڵه‌یه‌کی دیاریکراو ده‌نووسێت، به‌ جۆرێ ئه‌بێ پێش ئه‌وه‌ی کتێبێکی فاروق بخوێنیته‌وه‌ تۆ ئاماده‌ باشیت تیا بێ، تۆ هه‌موو ده‌سته‌واژه‌ فه‌لسه‌فییه‌کان بزانیت. کاتێک تۆ کتێبیکی فارووق ئه‌خوێنیته‌وه‌، له‌ بێ ئاگاییه‌کا ئه‌که‌ویته‌ نێو گێژاوێکی ده‌سته‌واژه‌ی ئینگلیزی، که‌ نه‌ له‌وه‌و پێش بینیوته‌ و، نه‌ گوێت لێ بووه‌! له‌ پڕ خۆت له‌ نێو وشه‌گه‌لێکی وه‌ک (فاشیزم – نازیزم – سیکۆلاریزم – تۆتالیتاریزم.. هتد) ئه‌بینیته‌وه‌. گه‌مه‌که‌ له‌وێیه‌، فارووق له‌ په‌راوێزیک مانای ئه‌و وشانه‌ت پێ ناڵێ، بۆیه‌ ئه‌ىی پێش خویندنه‌وه‌ی کتێبێکی فارووق تۆ ئاماده‌باشی بکه‌ی. له‌وه‌ته‌ی باسی فه‌لسه‌فه‌ هاتۆته‌ نێو نووسه‌ره‌ کوردییه‌کانه‌وه‌، هه‌یه‌ به‌ زمانێکی ڕه‌وان ده‌نووسێت، بۆ وه‌ڵامدانه‌وه‌ی پرسیاره‌ فه‌لسه‌فییه‌کان، لێ هه‌یه‌ به‌ وشکی ده‌په‌یڤێت كه‌ فه‌لسه‌فه‌ت لێ ده‌کا به‌ شتێکی زۆر له‌وه‌ قوڵتر که‌ بیری لێ ده‌که‌یته‌وه‌، بۆیه‌ ئه‌وانه‌ی له‌ جۆری یه‌که‌م ده‌نووسن سه‌رکه‌وتووترن و خوێنه‌ری زیاتر له‌ خۆیان کۆ ده‌که‌نه‌وه‌، ئه‌مما جۆری دووه‌م بگره‌ دوژمنیش په‌یا ده‌که‌ن، فاروق ڕه‌فیقیش له‌ جۆری دووه‌مه‌، به‌ڵام خۆیان گوته‌نی ئه‌وان دانابه‌زن بۆ ئاستی خوێنه‌ر، ده‌بی خوێنه‌ر به‌رزبێته‌وه‌ بۆ ئاستی ئه‌وان‌_ئه‌گه‌ر ئاستێكیان هه‌بێ_! له‌به‌ر ئه‌م هۆکارانه‌ش، من له‌ دوو به‌شی کتێبه‌که‌ تێنه‌گه‌یشتم، که‌ باسی (بیرکردنه‌وه‌ی ڕه‌خنه‌یی – ئه‌رگۆمێنت ) بوو، هه‌رچه‌ند گومانم له‌وه‌ هه‌یه‌ كه‌ نووسه‌ریش خۆی تێیبگات، ئاخر به‌وه‌ ناوترێت زمانی نووسین.