نووسینی: بیلال سه‌لمان



پێناسی کتێب: بۆ ئەوانەی وەکو خۆمن

کتێبی سێیەم

نووسەر: قانع خورشید

ژمارەی لاپەڕە: 225

لە بڵاوکراوەکانی پڕۆژەی ناوەندی بیری میانڕەو(هاوسانی) کتێبی ژماره‌ 50

ئێرە خانەقای ئەهلی حاڵە و وەرە و خەرقەیەک لەبەر بکە و ببە دەروێش، مەیکەدەیە بۆ شەیدایانی بادەی ئەوین، گرمە و تریشقەی دڵە و تەقێنەری جۆگەی چاو و خوڕەمکردنی سروشک بەسەر دەشتایی کوڵمەی تینوو، ئێرە ڕۆشنایی خۆری ڤینە و بە ئومێدی پریشکێک کزکز لێی ڕامێنە، وەرە و بەرامەی پاش بارانی مەحەببەت هەڵمژە و کووچەکانی ناوەوەت گوڵاوپرژێن کە.

ئەم کتێبە بابەت و کاتی دیاری نەکراوە، نووسەر کۆمەڵێ شتی جوان و ئومێدبەخشی هێناوە و تۆماری کردوون.

کۆمەڵە شتانێک لە باسی مەحەببەتەوە ده‌بێژێت، کە زۆر کەس ناتوانن بیڵێن یاخود پێیان ناوترێت، تیشک ئەخاتە سەر ئەو ئاریشه‌ و کێشانەی کە لە خۆشەویستیی چواردەورەوە دێنە ڕێ و نزیکەکان هۆکاری دروستبوونیانن، وەرە و بزانە تۆش وەهایت؟ ئەوانەی زۆر خۆشت دەوێن، دەبنە مایەی ئازار بۆت لە دەرئەنجامی کەم مەیلییان؟ بزانە ئەوانەی ئومێدی زۆرت پێیانە وەختێ مەیلیان ساردە لە تەکت  چ حاڵێکت هەیە؟ وشە و پەیڤت هەن قەت پێت ناوترێن؟ ئەمانە کۆمەڵە شتانێکن نووسەر لەنێو ژیانی خۆیەوە نووسیونی، ئێوەش تەماشا بکەن، بزانن وەکو وی وان؟

لێرە هەست بە عەبدبوونی خۆت بکە و سەرزەنشتی کردارەکانت بکە و گلەیی بکە لەو قسوورییانەی لەبەردەم خوادا هەیتە. فەرمانی عەبدایەتیت بەجێ بگەیەنە، زوو زوو وەبیری خۆتی بێنە کە تۆ بەندەیت بەندە!