نووسینی: جوبران خەلیل جوبران
وەرگێڕانی لە ئینگلیزییەوە: عەلی حسێن حەسەن
هەڵۆیەک بەسەر ئاسمانی مێرگێکەوە، کە مەڕ و بەرخێکی تێدا دەلەوەڕان، دەسووڕایەوە و برسییانە چاوی بڕیبوویە بەرخەکە. کاتێک خەریکبوو بنیشێتەوە و نێچیرەکەی ڕاو بکات، هەڵۆیەکی دیکە دەرکەوت و ئەویش بە هەمان مەبەستەوە، دەستی بە خولانەوە بەسەر مەڕ و بەرخەکەدا کرد. پاشان دوو کێبەرکێکارەکە، دەستیان بە شەڕ کرد و دەنگ و هاواریان ئاسمانی تەنی.
مەڕەکە سەیرێکی ئاسمانی کرد و زۆر سەری سوڕما، ئینجا ڕووی لە بەرخەکە کرد و گوتی: کوڕم، چەند سەیرە ئەو دوو باڵندە بەڕێزە، ئاوا پەلاماری یەکدی دەدەن. ئاخۆ ئەو ئاسمانە پان و بەرینە، بەشی هەردووکیان ناکات؟ نزا بکە، ناسکۆڵەکەم، لە دڵەوە داوا بکە خوای گەورە دوو برا باڵدارەکەت ئاشت بکاتەوە.
بەرخەکەش لە دڵەوە نزای کرد.