نووسینی: مسته‌فا مه‌حموود
وه‌رگێڕانی: یووسف خه‌لیل
زارۆیەكی یازدەساڵان، هاوڕێ دەساڵانەكەی خۆی لەسەر تۆپێكی لە گۆرەوی دروستكراو، سووتاند و كوشت، ئەو كاتەی منداڵەكان لە "حەدائیقولقوببە"دا بۆ خۆیان سەرگەرمی وازیی دووگۆڵی بوون؛ منداڵێك بە نێوی مەحموود ئیبراهیم بەرانبەر ڕكابەرەكەی كە نێوی عەبدوڵڵا حەسەن بوو، لەسەر "گۆڵێك"، بەشەڕ هاتن...
یەكەمیان گوتی: تۆپەكە بەنێو گۆڵەكەدا ڕەت بوو! بەرانبەرەكەیشی نكووڵیی لێ كرد، دەستەویەخەی یەكدییان گرت و دەمەقڕەی نێوانیان تاوی سەند، هاوزەمان یەكێك لە ئێشكگرەكانی ئەو دەوروبەرە، ئاگرێكی زەبەلاحی بە مەبەستی سووتاندنی پەڕە زێدە و بێكەڵكەكان، خۆش كردبوو، ئەوە بوو مەحموود پاڵێكی بە نەیارەكەی، عەبدوڵڵاوە نا و خستییە نێو ئاگرەكەوە... ئاور لە دەست و قاچ و كەلوپەل و هەموو جەستەی عەبدوڵڵا ئاڵا و خەڵكی ئەو ناوەیش لەپێناو ڕزگاركردنیدا گەلێك كۆشان؛ ماشێنی فریاكەوتن خێرا گەیاندییە نەخۆشخانەی دەمرداش، ئەو خەستەخانەیەی بە هۆی كاریگەریی سووتانەكەیەوە، گیانی تێدا سپارد! دواتر ئەحمەد فەوزی ئیسماعیل، بریكاری جێگر بۆ ڕووداوەكانی قاهیرە، لێكۆڵینەوەی ڕووداوەكەی وەئەستۆ گرت.
تاوانێكی زۆر دزێو و دڵتەزێنیش لە گەڕەكی "ساحیل"دا ڕووی دا، سەرتاشێك خاوەن چێشتخانەیەكی كوشتبوو، بە هۆی ئەوەی داوای كووپێك ئاوی بۆ خوشكەزاكەی لێ كردبوو، ئەویش ڕەتی كردبووەوە پێی بدات، سەرەتا كابرای دەلاك گلەیی لە خاوەن چێشتخانە دەكات، دواتر كەم كەم دەمیان لە یەك گیر دەبێت و گڕی ناكۆكیی نێوانیان زیاتر دەخرۆشێت، دەلاكەكە كێردێكی گەورە لە كابرای چێشتخانە بەرز دەكاتەوە و، هەر لەوێدا بێ یەكودوو لە ملەوە سەری دەبڕێت، پاش ئەوەیش وازی لێ ناهێنێت و جەستەی بەرەو شەقامەكە پەلكێش دەكات، تا ئەوەی هەر لەوێدا و بە بەرچاوی هەمووانەوە دە جار جەسەتەی دەداتە بەر چەقۆ و پاشانیش، هەر خۆی بە مەبەستی خۆڕادەستكردن، ڕوو لە بنكەی پۆلیسی "ساحیل" دەكات و ددان بە تاوانەكەیدا دەنێت!
لە كاتژمێر یازدەی سەرلەبەیانیدا، كتوپڕ گەنجێكی بیستوسێ ساڵان خۆی خزاندە نێو نووسینگەكەی سەرهەنگ "حەسەن ئەلمهێری"ی بەڕێوبەری بنكەی "ساحیل"ەوە، هاوزەمان هەردوو پەنجەی دۆشاومژە و ئەسپێكوژەی خوێنیان لێ دەتكا و مل و سەرسنگیشی، بە هۆی سووتانەوە پێكرابوون و چەقۆیەكی درێژی 35 سانتیمیی هەڵگۆزراو لە خوێنیشی بە دەستی ڕاستییەوە هەڵگرتبوو، بێ پێشەكی و ئەملا و ئەولا، لەنێو بنكەكەدا قیڕاندی و گوتی: هۆ ئەفەندی، بمشارەوە، من ناوم ئەحمەدە ئەحمەد، پیشەم دەلاكییە و، یووسفی خاوەن خواردنگەی گەڕەكی "ساحل" بە لێدان كەوتە گیانم، منیش بەم چەقۆیەی بە دەستمەوەیە، بەر چەقۆم دا، چێشتخانەكە لە شەقامی ژمارە دەدایە!
لێكۆڵەر و جێگرەكەشی دەستبەجێ بەرەو شوێنی ڕووداوەكە ڕۆیشتن و، دییان كە خاوەن چێشتخانەكە بە سەربردڕاوی و لاشەی تڵیشاوەوە بەر چەقۆ دراوە و، دە جێگەی چەقۆ، بە جەستەی خوێناوییەوە، دەبینرێت!
دوابەدوای لێكۆڵینەوە و بەدواداچوونەكان ئەوە ڕوون بوویەوە؛ كابرای بكوژ خوشكەزایەكی منداڵی بەرگدووری هەیە و هاوسێی چێشتخانەكەیە و لەوێندەر كار دەكات و، وا ڕاهاتووە بۆ خواردنەوەی ئاو گشت جارێك سەرێك بە خواردنگەكەدا بكات، ئەوە سێ رۆژێك دەبێت كابرای كوژراو، منداڵەكە لە چێشتخانەكە وەدەردەنێت و كووپێك ئاوی پێ ڕەوا نابینێت، دواتر مشتومڕ و دەمەقاڵێ لەنێوان ئەو و بەرگدووردا چێ دەبێت و، هەر خۆیان ئاشتیش دەبنەوە...
دوای چەند ڕۆژێك، كابرای بكوژ، كە خاڵۆی زارۆیەكەیە و پیشەی دەلاكی دەبێت، بەم كەینوبەینە ئاشنا دەبێت و بە مەبەستی لۆمەكردنی كابرای كوژراو، ڕوو لە خواردنگەكە دەكات؛ خاوەن چێشتخانەكە پاش سەعاتێك لە دوای هەمووانەوە ئامادە دەبێت، لە دوورەوە كە چاوی بە كابرای دەلاك، خوشكەزاكەی، خزمەكانی و شاگردەكانی گەڕەكی بەرگدوورەكان دەكەوێت، كە چۆن لە چاوەڕوانیی ئەمدا وا بە كۆمەڵ وەستاون؛ لای خۆیەوە ترسی شەڕ دەكەوێتە گیانی و وا خەیاڵ دەكات، ئەوان بۆسەیان بۆ ئەم ناوەتەوە و بە تەمای لێدانی ئەم وا گەلەكۆمەیان كردووە؛ بۆیە بە پڕتاوێك بەرەو نێو كۆڵانەكە ڕا دەكات، كابرای دەلاكیش ئەو دەبینێت و بە هەڵەداوان شوێنی دەكەوێت، لەنێو كۆڵانەكەدا لەیەك گیر دەبن، كابرا لە ترساندا مەنجەڵێك ئاوی كوڵاو كە لەسەر مێزی خواردنەكەدا دانرابوو، هەڵدەگرێت و لەحەیبەتان ئاوی كوڵاو بۆ دەموچاوی دەلاك تووڕ دەدات و زۆر بە سەختی كابرا دەسووتێنێت، ئەویش تا ئەوپەڕی شێتی، هار و دەهری دەبێت و دەستی دەگەیەنێتە ئەو چەقۆیەی، كابرای چێشتخانە بۆ پارچەپارچەكردنی گۆشتەكان بەكاری دەهێنێت و بە تووڕەییەوە، كابرا بۆ بەردەرگاكە پەلكێش دەكات و هەر لەوێدا ملی لە لەشی جیا دەكاتەوە، لاشەكەشی بەرەو سەر جادەكە ڕادەكێشێت و لە ترۆپكی شێتێتیدا، جەستەی بێگیانی دەداتە بەر چەقۆ و دە شوێن لە جەستەی دەپێكێت و بكوژ خۆیشی لە میانەی تاوانەكەیدا، ئەنگوستەكانی دۆشاومژە و ئەسپێكوژەی بریندار دەبن!
كابرای تۆمەتبار ڕووبەڕووی لێكۆڵێنەوە كرا و ددانی بەوەدا نا؛ كاتێك لەگەڵ كابرای خاوەن چێشتخانەدا بەشەڕ هاتووە، ئەم بە هیچ شێوەیەك مەبەستی كوشتنی ئەوی لە خەیاڵدا نەبووە و، كتوپڕ دایە پڕمەی گریان... دواتر بریكاری جێگر تا دەرچوونی ئەنجامی توێژینەوەكان، فەرمانی دا تاوانبارەكە زیندانی بكرێت، هەروەك چۆن تۆمەتی كوشتنی ئەنقه‌ستیشی دایە پاڵ و، جارێك لێكۆڵینەوە لە ڕووداوەكە بەردەوام دەبێت.
ئەمە نموونەیەكە لەو ڕووداوە دڵتەزێنانەی ڕۆژانە لە ڕووپەلی تاوانەكاندا دەیانخوێنینەوە...
پاڵەوانی ئەم كارەساتانە بەردەوام كەسێكە؛ لە باری تایبەتی خۆیدایە، نە هیچی كردووە و نە هیچیشی لەسەر بووە، لەپڕ بەڵایەك بەسەریدا دادەبارێت و لەنێوان چركەیەك و ئەوی دیكەدا، خۆی لەودیو میلی زینداندا دەبینێتەوە، كە خوێنی كەسێكی لەئەستۆدایە و، پەتێكی سێدارە چاوەڕوانیەتی و زیندانەوانێكیش بەسەر سەریەوەیەتی!
ئەو بكوژێكە، خۆیشی نازانێت چۆن!
ئەو بكوژێكە، كە تەمەنی یازدە ساڵ تێناپەڕێنێت، یان نموونەی ئەم دەلاكە، پیاوێك بێ هیچ پێشینەیەكی تاوانكاری، تەنیا بۆ گلەییكردنێك لە دراوسێ دووكانەكەی بەڕێ دەكەوێت، كەچی بە دەستانێكی گەوزاو لە خوێنەوە دەگەڕێتەوە، هێندەش تۆقیوە، خۆی خەریكە زنۆقی دەچێت و بە هەسكەهەسك بە مەبەستی ڕزگاركردنی، پەنا بۆ پۆلیس دێنێت!
وەختێك خوێنەر بەسەر ئەم دێڕانەدا تێدەپەڕێت، شەقشەق هەڵدەلەرزێت و لە دڵی خۆیدا ترسێكی سەرەتایی لا چێ دەبێت، لەوەی نەوەك ئەمیش مینا ئەو تاوانبارانە، ڕۆژێك بە بێوەیی لە ماڵ دەربچێت و بە زیندانكراوی، یان بەسەر تەختێكەوە بگەڕێتەوە، یاخود هەر نەگەڕێتەوە هەرگیز، بەڕاستی داهاتوو هەمیشە بارمتەی ئەو پێشهاتانایە كە غەیب بۆی شاردووەتەوە، بارمتەی ڕووداوە ناچارییە چارەننووسسازەكانە...
هیچ كەسێكیش نییە پێمان بڵێت؛ غەیب چیی لە هەناودا بۆ هەڵگرتووین و، چارەنووس چیی لێ شاردووینەتەوە...
نە دڵنیاییەك بوونی هەیە و نە گرەنتییەك!
هەموو شتێك دەشێت ڕوو بدات...
ئەگەرەكانی ڕێكەوت و پێشهات و قەدەرەكان، خۆ سنوورێكیان نییە!
ئەز بەردەوام، گەلێك بیر لەم جۆرە ڕووداوانە دەكەمەوە و لە خۆم دەپرسم: داخۆ ئەگەرەكانی ڕێكەوت و پێشهات و قەدەرە ناچارییەكان، هەر بەڕاستی زۆر و بێسنوورن؟! باشە دەكرێت مرۆڤ لە چركەساتێكدا، ئاوا زوو هەڵبگەڕێتەوە و ببێتە بكوژێك و بەو ڕادەیە وێنەی دڕندەیەكی جەنگەڵستان، تۆقێنەر خۆ بنوێنێت؟! ئاخر مەگەر دەشێت، هەڵكەوت بەو ئەندازەیە مرۆڤ لە ئەخلاق و قاڵبی خۆی دابڕنێت، كارێك ئەنجام بدات؛ كە لە سروشتی خۆیدا نەبێت؟!
ئایا ڕووداوەكان، هەر خۆیان سیفەتی ناچاری و بێگارییان لە خۆ گرتووە؟!
ئاخۆ دەشێت پێشهاتەكان هێندە مرۆڤ بتەوسێنن؛ ئەوە ئەنجام بدات كە لە سروشتی خۆیدا ڕەگی نەبێت، یاخود هەر بەڕاست قەدەر و ڕووداوەكان تەنێ ڕۆڵێكی پاسڤ و ناوەنجی وازی دەكەن، بەشێوەیەك هیچ شتێك بەسەر هیچ كەسێكدا ناسەپێنن، جگە لەوەی دەرفەتێك بۆ هەڵماڵینی پەردە لەسەر شاراوەكانی ئەم سروشتە و خستنەڕووی ناخ و كەسایەتیی ئەمی مرۆڤ، دەڕەخسێنن...
ڕاستییەكەی ئێمەی مرۆڤ لەم ڕێگەی ژیانەماندا، تەنێ بە ڕووی ناخی خۆماندا دەتەقینەوە، بۆیە وەختێك كەوتینە نێو تاوانێكەوە؛ ئەوە ئەرخەیان بە، ئێمە خۆمان هەر بە سروشت تاوانبارین و، ئەوە سووچی هەڵكەوت و قەدەر و پێشهاتەكان نییە، بەڵكو ڕووداوەكان تەنیا هەلێكمان بۆ خستنەڕووی ناخی خۆمان بۆ دەسازێنن و هیچی تر...
من لەگەڵ ئەم ڕایەدام، من وا دەزانم مرۆڤ لە ڕووداوەكان بەهێزترە!
هیچ شتێك نییە لە دەرەوەی توانای مرۆڤدا ڕوو بدات و بەشێوەیەك سیفەتی ناچاریی لە خۆ گرتبێت، كە ئیرادەی ئینسان لەبەین بەرێت، ئاخر كاتێك ئێمە تووشی كێشە، كارەسات، لێقەومانێك دەبین؛ ئەو وەختەی قەدەغەیەك دەقەومێت، نە تێدەكەوین و نە تێوەدەگلێین، بەڵكو تەنێ هەڵدەبژێرین، حەقیقەتی خۆمان هەڵدەبژێرین و هیچی تر، ڕووداوەكانیش بە هیچ جۆرێك چارەنووسێكمان بەسەردا ناسەپێنن، كە لە قووڵاییی ناخی خۆماندا بوونیان نەبێت!
بێگومان تاوانەكان بۆخۆیان ڕیشەیان هەن، هەموو ئەوەی ڕووداوەكان دەیكەن تەنێ ئەوەیە؛ دەرفەتێك دەبەخشن، بارودۆخێكی لەبار دەسازێنن، بۆ ئەوەی ئەم ڕیشانە گەڵای خوێنینیان لێ شین ببێت!
ئەو خاوەن چێشتخانەیەی لە ڕووداوەكەدا كوژرا، هۆكاری كوژرانەكەی تەنیا ترس و شڵەژان و تۆقین و وێنایەكردنێكی پڕوپووچی خەیاڵپڵاوانەی خۆی بوو، وەهمی ئەوەی هەمیشە كەسانێك هەن، ڕەدووی ئەم كەوتوون و بۆسەیان بۆ ناوەتەوە، خەیاڵێكی دوژمنكارانەی خۆكردی خاوی بێبنەما كە بەردەوام بەدوایەوە بوو، هاوزەمان بارودۆخیش مەنجەڵێك ئاوی كوڵاوی خستە ژێردەست، تا لەكاتی ڕووبەڕووبوونەوە لەگەڵ ئەم دوژمنە خەیاڵییەی خۆیدا، بەرگری لە خۆی پێ بكات...
ئەوە بوو، هەڵچوون و هەڵەشەییەكەی خۆیشی، كەمێك ئاكامەكەی خێراتر بە دەستەوە دا و، بە پەلە دەستی بۆ مەنجەڵەكە برد و خێرا بۆ دەموچاوی بكوژەكەی فڕێ دا!
بێگومان ئەو پاڵنەرە سەرەكییانەی بوونە هۆی ئەم كارە، هەر خۆیان لە قووڵایی ناخی كابرای كوژراودا ڕەگیان هەبوو؛ ترس، تۆقین، شپرزەیی، هەڵەشەیی و زووهەڵچوون. دەشێت هەمان ئەم هۆكار و پاڵنەرانە لە هەر بارودۆخ و زەمان و دەرفەتێكی تریشدا، یەكیان گرتبا و هەمان ئاكامیان بەدەستەوە دابا، گەر ئەمە نەقەومایە و تەمەنی كوژراویش هێندێك درێژتر بووایە؛ لە هەر وەختێكی دیكەی تەمەنیدا، دەكرا ئەمە هەر ڕووی بدایە، ئاخر خۆی سروشتی ئەوەی دەخواست و تەنیا چاوەڕێی هەلێك بوو!
ئەم گەڕەلاوژەیە هەر دەبوو ڕۆژێك ڕووی دابا، ئاخر لە ناخی كابرا خۆیدا، ڕیشەی داكوتابوو.
بێگومان هەڵكەوت و چارەنووس هیچ شتێكیان، جگە لەوەی لە سروشتی خۆیدا هەبوو، بەسەر ئەمدا نەسەپاند، بەڵكو تەنیا دەرفەتێكیان بۆ ئەم ناخ و دەروونە ڕەخساند، تا بە كرێتترین و دڕەندەترین شێوەی حەقیقیی خۆی، خۆی بنوێنێت!
كۆی ڕووداوە دوابەدواییەكانی دیكەیش، زنجیرەیەكی دیاری چاوەڕوانكراویان هەیە، ئەو دڕەندەیەی دی، ئەوەی ئاوە كوڵاوەكەی بەسەردا ڕژێنرابوو، سنگی دەسووتا، ڕووخساری دەكوڵا، ئاگری تووڕەییشی تا دەهات، زێتر و زێتر تاوی دەسەند، هاوزەمان قەدەریش چەقۆیەكی بڕبەندی خستە پێش چاوانی، درێژییەكەی 35 سانتیم بوو، ئاخر ئەگەر خۆی سروشتی لەوان كەسانە بووایە، كە حەز بە شەڕوشۆڕ و سەربەگۆبەن نین، خۆی لە وەها كارێك دەبوارد و بێوەیی و ئاشتیی هەڵدەبژارد، بەڵام ئەو سروشتی نێچیرێكی دڕندەی لە دڵدا بوو، هەر ئەوەیش وای لێ كرد، بەو شێوە ترسناكە پەلاماری بدات و سەری ببڕێت..
ئاخر ئەو تەنیا بە سەربڕینیەوە نەوەستا، بەڵكو بە قوربانییەكەوە خەریكی خۆنواندن بوو، دە جاری تر لاشەی بێگیانی بەرچەقۆ دایەوە، جەستەی پارچەپارچە كرد، ئاخر لەو كاتەی لە سەربڕینی كابرا بوویەوە، خۆ هیچ شتێك نەمابوو تا لێی بترسێت، هیچ شتێك ئەوەی نەدەسەپاند تا دە جاری دی بە مردووێتی بەرچەقۆی بداتەوە، لە واقیعیشدا هیچ پاساواێك ئەوەی نەدەخواست، بەو شێوەیە نواندن بە تەرمێكەوە بكات، بەڵكو تەنیا پاڵنەر و بیانووی، ئەو واقیعە دەروونییە بوو كە سەردەمانێك لانەی لە دڵیدا خۆش كردبوو، ئاخر ئەو پیاوێكی بریندار نەبوو، بەڵكو ئەو هۆڤییەكی پێكراوی زامدار بوو! كەوایە ئەو ساتە، وەختی هەڵبژاردن و هەڵوێستوەرگرتن بوو، نەك ساتێكی ناچاریی سەپێنراو، ئەو ساتەی دڕندەكە خودی خۆی تێدا هەڵبژارد و سروشتی خۆی تێدا بۆ هەمووان دەربڕی!
لە هەر بارودۆخێكی دیكەی هاوشێوەی ئەمەدا بووایە، ئەم پیاوە هەر دەبوو یەكێك بكوژێت، لەو هەموو پێشهات و تێكچڕژانە دوژمنكارانەیەی بە درێژایی تەمەن بۆ ئەم هۆڤییە ترسناكە دەهاتنەپێش، ئیدی بە هۆی ئەم ڕووداوە یاخود هەر شتێكی دیكەوە بایە، ئەو هەر دەبوو كەسێك بكوژێت!
بێگومان ئێمە خۆمان لە بەدیهاتنی هەموو ئەو ڕووداوانەدا كە چارەنووسمان دیاری دەكەن، بەشدارین، هەموو كەسێك بە ڕووی ئەو ڕووداوانەدا دەتەقێتەوە، كە لە وێنەی خۆیین و، لە شێوەی ناخی خۆیین...
ئەو دوو زارۆیەی بە گڵۆڵە گوێرەوییەكەوە، لە نزیك ئاگرە خرۆشاوەكەدا بۆ خۆیان تۆپانیان وازی دەكرد، جیاوازییەكی زۆر لەنێوان ئەوان و هەردوو سەركردەی گەورەی وەك "كەنەدی" و خرۆشۆڤ"دا نییە، كە لە نزیك ئاگری خرۆشاوی هێزی ناوكییەوە، یارییان بە گۆی زەوی دەكرد؛ ئاخر ئەو كاتەی یەكێكیان ئەوی دیكەیان دەخاتە نێوە ئاگرەكەوە، بەدڵنیاییەوە ڕووداوێكی بەڕێكەوت نابێت، ئەو كاتەی هەموو مرۆڤایەتی لە جەنگێكی تەفروتوناكەردا بەهۆیانەوە دەفەوتێن، بێگومان هیچ یەكێك لەوانە بەڕێكەوت نابن!
ئاخر ئەم جۆرە ڕووداوانە لە قووڵایی دڵەكانەوە ڕیشەدارن، ڕیشەی شەڕ، ڕق، كینەدۆزی، ئاژاوەگێڕی...
لە پشت ئەو چاوە زیرەكانەی بە ڕووخسار نەزاكەتیان لێ دەبارێت، دڕندەگەلێكی نووستوو خۆیان مەڵاس داوە!
ئەو خەڵكانەی بەسەر شەقامەكاندا دێن و دەڕۆن و وەك كەسانێكی گێل و سادەلەوح كە لەوپەڕی باری تایبەتیی خۆیاندا بن، دێنە پێش چاوان، ئا ئەوانە خۆیان هەمان ئەو خوێنڕێژانەن كە لە سەربازگەكانی گرتووخانەی نازییەكاندا پێستی قوربانییەكانیان دادەڕنی، بە ملیۆنان نموونەی ئەوانە هەبوون، كە گوێلەمستانە بە دوای هیتلەر و دارودەستەكەی كەوتبوون و، بە بۆمب و چەك و تەقینەوەكانیان، جیهانیان وێران دەكرد و ژن و منداڵی بێتاوانیان پێ دەسووتاند، تۆش ئەگەر رۆژێك لە ڕۆژان لە هەر شەقامێكی ئاسایی ئەم جیهانەدا، لە هەر كات و شوێنێكی تردا، چاوت بە هەر یەكێك لەوانە كەوتبا، بە هیچ شێوەیەك لەگەل پیاوێكی ئاسایی سەرشەقامدا، جیاوازییت نەدەكردن!
ڕاستییەكەی من باوەڕ ناكەم؛ ئەوەی بۆمان دێتە پێش، بۆ خۆمان نامۆ بێت و بە سروشتمان نائاشنا...
باوەڕم بەوە نییە؛ بارودۆخەكان بۆ شتانێك پاڵمان پێوە بنێن، كە لەگەڵ ویست و ویژدانماندا وێك نەیەنەوە!
ئەز بە هیچ كلۆجێك باوەڕم بە ناچاری و زۆرەملێ نییە، ئەو وەختەی خودا بەرەو قەدەرێك دەمانبات، ئەوە بێگومان بەرەو خودی خۆمانمان دەبات و هیچی تر!
ئەو وەختەی چارەنووسە قەدەغەكراوەكە دەقەومێت؛ هیچ كەسێك بەسەریدا نەسەپاندووین، بەڵكو ئەوە ئێمەین، ئەو هەڵدەبژێرین.
ڕاستییەكەی ئێمە خۆمان هەم بڕیاردەرین و هەم چارەنووس، ئەوەشی بەسەرماندا دێت، تەنیا جێپەنجەی خۆمانە، جێپەنجەی ناخی خۆمان!
دەی ئێستا جارێكی دی، پەڕەی تاوانەكان سەرلەنوێ بخوێننەوە و باش باش بیریان لێ بكەنەوە و پێم بڵێن: داخۆ من هەڵەم یاخود ڕاست؟!