خەم و خەو وەکو هەور و با، ڕووناکی و تاریکی، دەنگەدەنگ و کپی وان، کە یەکێکیان هاتن، ئەوی دی دەڕوات.

هەموومان پێویستمان بە چیرۆکێکی شادیئامێز، ئومێدێکی خۆشیهێن و، یادگارییەکی شیرین هەیە کە هەمیشە بە زیندوویەتی لە خەیاڵدانماندا بمێننەوە و، هێندە ڕووحیان وەبەردا بکەین کە هێزی زاڵبوونیان بەسەر خەمەکانماندا هەبێت و، هەرکات خەم هێرشی بۆ هێناین ڕاستەوخۆ پەنا ببەینە بەر خەڵوەتگەی خەیاڵی شیرین و خۆمانیان ڕادەست بکەین، تا لەگەڵ خۆیاندا بۆ نێو خەونێکی شیرین بمانفڕێنن.

خەیاڵ، لانکە و ماڵی بێپەنایان و، جێداڵدە و خەڵوەتگەی بێنەوایان و، مانگێکی گەشی نێو ئاسمانێکی ڕەشە.

چیرۆکی ئەوین پڕ وزەیە، دەتوانێت ناخی بەردین هەڵکۆڵێت و، پەردەی کات و تەمەن بدڕێنێت و، بەدرێژاییی تەمەن لە دڵێکی سەنگیندا بمێنێتەوە. دەکرێت ئەوین ئەو چیرۆکە بێت کە بەرەنگاری خەم ببێتەوە و، ئاوێزانی شادمانیمان بکات، ئەگەرچی کاتییش بێت.